دورة تجويد

[align=center]بسم الله الرحمن الرحيم

رب يسر و أعن


السلام عليكم ورحمة الله و بركاته
اخوانى فى الله هذه مساهمة من اخيكم فى الله لنتدارس العلم بيننا

ارجو ان ينفعنا الله بما علمنا وان يتقبل عملنا خالصا لوجهه الكريم

قبل ما نبدأ احب ان انبه ان الكتابة فى الموضوع ستكون سلسة ان شاء الله

ومزيج من الفصحى و العامية

نبدأ على بركة الله تعالى

اولا : احنا حندرس ايه؟

1- مقدمة عن التجويد ( يعنى ايه تجويد , و ليه بنتعلمه , و الحكم الشرعى لتعلمه)

2- مخارج الحروف و اخطاؤناعند نطقها

3- صفات الحروف ( هى الحروف ليها صفات ؟ طبعا )

4- احكام النون الساكنه و التنوين

5- احكام النون و الميم المشددتين

6- اللامات ( شمسيه و قمريه و لام الفعل)

7-المدود

8- علاقات الحروف ببعضها

9- احكام الراء

10- قواعد خاصة برسم المصحف( المقطوع و الموصول , التاءات المفتوحة و المربوطة)




ثانيا : لمن هذا الموضوع؟


لكل من ليس له خلفية عن التجويد او له خلفية محدودة

* يعنى اللى بيعرف تجويد ملهوش مكان هنا يا شيخ ؟

طبعا ليه مكان بس القافلة تسير على قدر اضعفها

يعنى اييييه؟

يعنى والله لو حتشارك فى حدود الموضوع اهلا و سهلا بيك

حتخرج عن حدود الموضوع ( يعنى اسئلة من نظام الاختبارات و نظام فلان قال ) ده مكانها مش هنا

حنقول لسيادتك جزاك الله خيرا و يا ريت متضيعش و قتنا


كمااااااااااااااااان حااااااااااجة مهمة جداااااااااااااااا

الموضوع حيكون قابل للردود بس .......يعنى ايه؟

بعد اذن الاخوة مش حيكون فيه مشاركات فى الشرح و ذلك منعا للتشتت


وبعد كل كام درس ان شاء الله حنعمل امتحان فى اللى فاات


حاجة اخيرة قبل ما نبدأ:

الموضوع فى بدايته صعب شويةو التطبيق مش كتير بس لو صبرنا حنلاقى نتيجة بإذن الله كويسة


على قدر اهل العزم تأتى العزائم

و على قدر اهل الكرم تأتى المكارم[/align]

رد: دورة تجويد

هاني مكاوي قال:

بارك الله فيك أخي الفاضل المتولي

كما تعرف أخي فالتجويد علم، وقد قال السلف رحمهم الله "إن هذا العلم دين فتحروا عمن تأخذوا دينكم"

هذا الوضوع ليس موضوعا عاديا، ويلزم أن نعرف شيئا عنك وعن اختصاصك في هذا الفن قبل التفاعل.

هذه ملاحظة أرجو أن تتقبلها بصدر رحب التزاما منا برسالة المنتدى.

أنقر للتوسيع...

حفظ الله اخى الكريم وجزاك الله خيرا وزادك حرصا على الحفاظ على العلم

اخوكم فى الله من مصر (( الاسكندرية ))

قرات على

1- الشيخة ام السعد رحمها الله تعالى

2- الشيخ محمد عبد الحميد عبد الله (( ولم اكمل لسفر الشيخ ))

3- الشيخ عبد الحميد عنتر رحمه الله تعالى

4- الشيخ محمد سكر

5- الشيخ عبد الحميد يوسف منصور

6- الشيخ وليد عاطف

7- الشيخ محمد عبد العظيم

8- الشيخ جمال فياض

ولازلت اقرأ على الشيخ محمد سكر حفظه الله تعالى العشر الكبرى افرادا

اسأل الله ان يمن علي بجمعها

وجزاكم الله خيرا

رد: دورة تجويد

عضو19 قال:

جزاك الله خيرا...
نسأل الله تعالى أن يعيننا على اتباع دورتك..
ياليتك فقط تبين النظام يعني التوزيع الزمني للدروس حتى نحاول التفرغ لذلك.

أنقر للتوسيع...

جزانا و اياكم اخى الفاضل

ان شاء الله تعالى الدروس حتكون يوم السبت من كل اسبوع

رد: دورة تجويد

[align=center]بسم الله الرحمن الرحيم

(ربنا عليك توكلنا و إليك أنبنا و إليك المصير)

السلام عليكم و رحمة الله و بركاته

اليوم موعدنا مع اول درس فى الدورة بتاعتنا

يعنى إيه تجويد؟؟؟؟؟؟؟؟

التجويد ان سيادتك تدى الحرف حقه و مستحقه

ازاى؟

بص يا سيدى :

انا اسمى محمد : ده حق ليه معملتش حاجه علشان اخده جميل

ده معنى كلمة حق الحرف

حق الحرف هو الصفات اللى منين ما يكون موجود فى الكلمة لازم تكون فيه

امال يعنى ايه مستحق: لو عندنا واحد اشتغل مش ياخد فلوس

وساعتها بنقول ده يستحق اجرته

نفس الكلام فى الحروف: مستحق الحرف : هو الصفات اللى بتتغير فى الحرف على

حسب مكانه و تشكيله فى الجملة

نشوف امثلة و حنفهم معنى الكلام

الراء فى كلمة رءوف و كلمة يريد

تحس ان الرائين مش زى بعض ......ازاى؟؟؟؟؟؟؟؟؟؟؟

حتحس ان الاولى تخينه شويه و التانيه رقيقه و بتخرج زى ما بنقول كلمة ريرى
ده معنى مستحق الحرف

لما كانت الراء مفتوحة زى رءوف كانت تخينه

ولما كانت مكسوره فى يريد كانت رفيعه

يعنى على حسب مكانها فى الكلمة و كمان التشكيل


طب تعالى نقول : طالب بطيخ حاسس بفرق

مفيش ليه : بالرغم ان الاولى مفتوحه و التانيه مكسوره ( مين اللى بيقول فيه فرق)

الطاء على طول تخينه يعنى ده حقها

هى ربنا خالقها كده


فهمنا يعنى ايه حق الحرف و مستحقه



طب انا حتعلم تجويد ليه؟ ما انا بقرأ القرآن صح


تسمح تقولى مين اداك الفكرة ده



والله انا اعرف ناس دكاترة و اساتذة جامعة و لما يجى عند المصحف يتهته

كمان كفايه انى لما حتعلم التجويد حقرأ زى ما كان الرسول بيقرأ و زى ما ربنا يريد




طب يا عم الشيخ هو لازم نتعلم تجويد؟ يعنى لو قرأت القرآن من غير تجويد عليه ذنب؟

طبعا عليك ذنب

ايه الكلام اللى انت بتقوله ؟وعندك دليل؟ امال الحديث بتاع ومن يقرأ القرآن و هو عليه شاق فله أجران يقصد ايه؟

اصبر بس واحده واحده

فيه فرق انك تقرأ القرآن بالتجويد و بين انك تتعلم الجزء الاكاديمى منه

يعنى ايه؟؟؟؟؟؟؟؟؟؟؟؟؟؟؟؟

يعنى سيادتك مش مطالب تعرف انت بتعمل ليه غنه او ادغام( اسم الحكم يعنى)

بس سيادتك مطالب انك تقرأ الكلمة اللى فيها غنه بالغنه بتاعتها( تلقى يعنى)

جاء رجل الى ابن مسعود فقرأ( للفقراء المهاجرين ) من غير ما يمد الالف

فقال له ابن مسعود : ما هكذا اقرأنيها رسول الله

فقال له الرجل : و كيف أقرأكها يا ابن ام عبد

فقال له ابن مسعود : للفقرآء المهاجرين( بالمد)

خلاص : المد بأه فى الكلمة ده بنقول عليه واجب متصل

المطلوب من سيادتك انك تمد الالف بس لا تعرف يعنى ايه متصل و لا غيره

كده حتكون سيادتك معلكش ذنب

امال حتعلم تجويد ليه معاك بأه

طبعا مع الوقت بيدخل على الواحد شك هى كان الكلمة ده فيها حكم ولا مفيهاش
علشان كده لما حضرتك تتعلم الجزء النظرى المعلومة حتثبت

كده خلصنا اول درس يا رب تكون كل حاجه واضحه


اللى عايز يسئل يتفضل و اللى عايز يقترح يتفضل برده

و السلام عليكم ورحمة الله و بركاته[/align]

رد: دورة تجويد

عضو19 قال:

بارك الله فيك.
لا أدري إن كنت تتعمد العاميّة أم لا فأنا شخصيا يتعبني قراءة نصوص طويلة مكتوبه بها....أما إن كانت لك أهداف فهذا أمر آخر.

أنقر للتوسيع...

اخى الحبيب:

الموضوع اساسا موجه لمن ليس له خلفية بالتجويد وهؤلاء فى الغالب يملون من الفصحى

فأنا نبهت فى البداية ان الموضوع سيكون مزيجا ما بين الفصحى و العامية

وجزاك الله خيرا

رد: دورة تجويد

بلى اخى الحبيب

واستاذتنا ماشاء الله تعالى اجادت واضاءت الركن بمواضيعها

وعليه فاعتقد والله اعلم ان الاخوة ليسوا فى حاجة الى مثل هذه الدورة